Actualités

TAPATAPANY

Actualités
Alatsinainy 17 Febroary 2014

Miandry ny fitsanganan’ny governemanta vaovao miaraka amin’ny famerenana amin’ny laoniny ny demokrasia sy ny fanjakana tan-dalàna i Etazonia, hoy ny mpanolotsaina vaovao misahana ny serasera sy ny lafiny ara-kolontsainan’ny masoivoho,’i Etazonia, Luke V. Zahner.

Ao anatin’ny fivoriana manokan’ny Antenimieram-pirenena ny 18 febroary vao tokony ho hita soritra ny maro an’isa sy ny mpanohitra, hoy ny Sehatra Fanaraha-maso ny Fiainam-pirenena. Raha tafiditra ao anatin’ny fomba parlemantera ny fifampidinihana dia tsy azo ekena kosa ny ady seza, ny rahona ary ny kolikoly.

Hahatratra hatrany amin’ny 20.000 taonina isan-taona ny vokatra siramamy hivoaka ao amin’ireo orinasan’ny Sirama Nosy Be sy Brickaville aorian’ny fiverenan’ny asam-pamokarana.

Ireo karatra fanasana nivoaka avy amin’ny sampandraharaha mikirakira ny arofenitra eny anivon’ny Antenimieram-pirenena no manan-kery amin’ny fivoriana tsy ara-potoana hatrehin’ireo solombavambahoaka ny talata 18 febroary 2014.

Hanan-danja manomboka amin’ny voalohan’ny volana aprily 2014 mandritra ny fifidianana Ben’ny tanàna ny vato fotsy any Frantsa. Lany teny anivon’ny Parlemanta ny faran’ny herinandro teo io volavolan-dalàna naroson’ireo antoko afovoany frantsay io.

Nitrangana lozam-pifamoivoizana teny Ilanivato akaikin’ny paositry ny polisy ny sabotsy folakandro teo. Mpitaingina moto no nandona zazalahy handeha hiampita ny arabe. Tsy nahatsiaro tena avy hatrany ilay voadona ka nentina namonjy hopitaly avy hatrany.

Ramano F.