Actualités

Kaominina Bongatsara Nahazo trano famakiam-boky vaovao

Actualités
Talata 05 Jolay 2016

Raha nifampitadiavana ny trano famakiam-boky tao Bongatsara Atsimondrano roa taona lasa izay dia nahazo vaovao ireo mpianatra ao an-toerana.

Ny faran’ny herinandro teo no nitokanana ny fotodrafitrasa, fanomezana avy amin-dRamatoa Voahangy Rajaonarimampianina, vadin’ny filoham-pirenena. Nambarany fa azon’ny rehetra ampiasaina ny trano na dia ho an’ireo kilonga madinika mbola any amin’ny ambaratonga fototra aza no nanaovana azy. Toraka izany koa ny sarambabem-bahoaka, indrindra fa ireo olona tsy mahay mamaky teny sy manoratra. Mbola betsaka azy ireny mantsy ao amin’ity kaominina ity, indrindra fa ny vehivavy. Ahitana ireo karazam-boky rehetra ilaina ny trano famakiam-boky ka anisan’ny nanatevina izany ny loholon’i Madagasikara voafidy eny an-toerana. Nisy koa ny fanolorana fitaovana ho an’ireo ankizy madinika rehetra hiatrika ny fanadinana CEPE. Narahina fanolorana bodofotsy mafana ho an’ireo zokiolona sahirana manerana ny kaominina ny hetsika ho fanampiana azy ireo amin’ny fiatrehana ny vanim-potoanan’ny ririnina.

Pati