Fiarahamonina

Partagé sur :
• facebook

Ny tsapa taorian’ny fanadihadiana samihafa natao taorian’ny fivoahan’ny voka-pifidianana ofisialy ho filoham-pirenena dia toa matahotra maneho heviny ny ankamaroan’ny mponina ao Toliara sendra anay, manoloana ny raharaham-pirenena amin’izao, ny momba ny famindram-pahefana nataon’ny filohan’ny FAT tamin’i Hery Rajaonarimampianina omaly, ary ny mahakasika fianianana hataon’ny filoha vaovao etsy Mahamasina anio.

Lasa ihany ny saina raha bangoina ny fahitana ny zava-misy ao amin’ny tanànan’ny masoandro ! Manjaka ve ny ramatahora an-kolaka manoloana ireny tsaho ninian’ny sasany naely ireny, sa mbola samy miandriandry ny toromarika amin’izay lalan-kaleha ny olona. Hatramin’ny tompon’andraikitra sy mpilomano politika dia tsy ahitan-teny nefa Faritany malaza mafana tsy manaiky lembenana amin’ny tsindry mahazo azy i Toliara amin’ny ankapobeny. Izay sendra anay dia samy nilaza fa «tsy manan-kambara». Ny sasany «mbola ho avy ny fotoana».

Raha fehezina, tsy mbola sahy manambara izay heviny manoloana ny toe-draharaham-pirenena ny olona ao Toliara. Ny “radio voatavo ” sy ny honohono no mahazo vahana, indrindra ny amin’ireo miady hevitra eny am-pividianana gazety. Misy koa ny mba miezaka mifandresy lahatra eny an-dalambe rehetra eny, fa ny itovizana dia ny ahiahy ny amin’ny ampitso, ny amin’ny ho mety fidangan’ny vidim-piainana atsy ho atsy hampitombo indray ny fahasahiranana efa tafahitsoka lalina, indrindra ny amin’ny fiantraikan’ny fiakaran’ny vidin’ny solika. Efa manao kajy an-kandrina ihany koa ny ankamaroan’ny sendra anay ary maniry mba hisian’ny filaminana sy fiverenan’i Madagasikara amin’ny laoniny amin’izay lavitry ny krizy vaovao.

E.R

Tia Tanindrazana

Samia mijoro ho an'i Gasikara.