Dr Robinson Jean Louis

Partagé sur :
• facebook

Nandritra ny fankalazana ny andro iraisam-pirenena momba ny SIDA omaly alahady 1 desambra no nanambaran’ny Dr Robinson Jean Louis fa nitotongana ny lafiny ara-pahasalamana nandritra ny fitondrana tetezamita.

Nohazavainy ary fa maherin’ny 25 tapitrisa ny olona matin’ny aretina SIDA teo anelanelan’ny taona 1981 sy 2007. Amin’ny maha mpitsabo ahy, hoy ny Dr Robinson Jean Louis dia nanaitra ahy ny tatitra nataon’ny Banky Iraisam-pirenena fa hatramin’ny fanonganam-panjakana tamin’ny 2009, dia olona iray ao anatin’ny efatra izay tratry ny aretina no tsy nanatona toeram-pitsaboana noho ny antony ara-bola. Tena izany no zava-mitranga satria lafo ny fanafody ary ny ankamaroan’ny olona dia tsy manana fahefa-mividy hahazo azy ireny. Noho izany indrindra no nilazan’ny Dr Robinson fa rehefa tsy misy fitoniana ara-politika, dia matetika ny resaka fitsaboana no mitondra faisana voalohany. Tsy maintsy ataontsika ny hamerenana fitoniana ara-politika eto Madagasikara, hoy izy. Ny fananana drafitra ara-pahasalamana ara-dalàna no azo antoka fa hanampy antsika hanarenana ny firenena. Ny fanakatonan’i Andry Rajoelina sy Hery Rajaonarimampianina ny tobim-pahasalamana miisa 400 dia fanapahan-kevitra tsy mitombina no sady famonoan’olona tsotra izao. Mampanantena aho , hoy ny Dr Robinson fa hampitombo ny isan’ny tobim-pahasalamana manerana ny Nosy ary hampiroborobo ny lafiny ara-pahasalamana mba hahafahan’ny olona rehetra mahazo ny fitsaboana izay ilainy”.

Nangonin’i RTT

Tia Tanindrazana

Samia mijoro ho an'i Gasikara.