Actualités

Andoharanofotsy CT voaantso eny amin'ny zandary

Actualités
Alakamisy 22 Desambra 2011

Ny sabotsy teo tokony ho tamin'ny 7 ora hariva no nandona lehilahy iray ny fiaran'ity mpikambana ao amin'ny Kongresin'ny tetezamita (CT) ity teny Andoharanofotsy.

Taorian'ilay loza anefa dia nitsoaka ilay fiara. Nosakanan'ny Fokonolona vao nijanona. Noteren'ny olona hiverina haka ilay lehilahy voadona. Niverina ilay fiara naka ilay lehilahy ary handeha hitondra azy eny amin'ny hopitaly. Tsy lasa lavitra anefa dia nanao tampody fohy indray ary nikasa ny hanary ilay lehilahy izay tsy nahatsiaro tena efa tao anatin'ilay fiara. Tratry ny zandary indray anefa ka tsy maintsy nanohy ny diany ihany. Rehefa tonga teny amin'ny hopitaly indray dia nolazain'ireo mpanatitra fa tsy mahatsiaro tena noho ny toaka ilay lehilahy. Raha ny filazan'ireo fianakavian'ny maty aza dia ireo olona tao anaty fiara ireo ihany no nandraraka toaka teo amin'ilay lehilahy maty.

Tamin'io fotoana io anefa efa naratra anaty ny lohan'ilay lehilahy ary nisy pempo mihitsy. Ora vitsy taorian'izay dia namoy ny ainy ilay lehilahy. Nantsoina teny amin'ny tobin'ny zandary teny Andoharanofotsy ilay Ct natao famotorana. Efa-dahy izy ireo no tao anatin'ilay fiara tamin'io fotoana nitrangan'ny loza io.

Nirina