Politique

Partagé sur :
• facebook

Tsy lanin’ny vavonin’i Voninahitsy Jean Eugène ny fanesorana ny ministry ny asam-panjakana Noelson William izay mbola notoriana eny amin’ny fitsarana ihany koa.

Tsy rariny io fanalana io raha ny heviny satria maro ireo ministra sy mpitondra ambony ao amin’ny FAT izay manao fahadisoana sy halatra be lavitra noho ny vitan’i Noelson William anefa mbola mijanona amin’ny toerany. Ireo olona akaiky an’i Andry Rajoelina indrindra no notononiny ho tompon’antoka amin’ireo afera maloto isan-karazany toy ny fanondranana “bois de rose”. “Tsy mahay afa tsy ny manaratsy ny mpitolona nametraka izao fitondrana izao any amin’ny filoha FAT ireo olona ireo. Tsy mahagaga mihitsy koa raha nanao ireny fihetsika mamoafady ireny ry kolonely Charles sy ny jeneraly Noel”, hoy ity gadra politika nafahan’ny FAT ity.

Momba ny tsy fahafahan’Atoa Marc Ravalomanana niverina an-tanindrazana dia nambarany fa fihetsiketsehana entin’ity filoha teo aloha ity hampalaza ny tenany ireny zava-nisy ireny. Fantatro tsara i Marc Ravalomanana, hoy izy, fa olona saro-tahotra ka tsy sahy hody eto Madagasikara izany. Nasiany resaka koa ny sori-dalana nalefan’ny filoha Joaquim Chissano ka nanambarany fa ankasitrahany sy ny vondrona Les AS izay tarihiny ny ankamaroan’ireo andininy voalaza toy ny fanatontosana ny famotsoran-keloka mialoha ny fifidianana sy ny fitsinjarana ara-drariny ny toerana eo anivon’ny CENI, ny CT ary ny CST. Angatahiny kosa anefa ny hanitarana ny famotsoran-keloka hatramin’ny taona 2010 mba hahatafavoaka ireo miaramila voarohirohy amin’ny raharaha FIGN sy BANI.

Tia Tanindrazana

Samia mijoro ho an'i Gasikara.