Politique

Partagé sur :
• facebook

Fotoana manokana nifanakalozan-kevitra teo amin’ny mpitarika sy ny mpitolona hanarenana ny hoavy no nitranga teny amin’ny Magro Behoririka omaly alahady 20 febroary.

Fotoana nilazan’ny olona ny heviny sy ny hitany mba hampahomby ny tolona amin’ny ho avy. Tetsy andanin’izany dia nisy fihaonan’ny Vondron’olon-tsotra avy amin’ny Faritra samihafa eto amin’ny Nosy ihany koa tetsy Ambatonakanga, omaly tolakandro. Niditra an-telefaonina nivantana tamin’io fihaonana io ny Filoha Marc Ravalomanana izay nilaza mazava fa «Noho ny fahitana ny zava-nitranga tamin’ny sabotsy dia nanapa-kevitra ny SADC fa hivory amin’ity herinandro ity. Hamboarina ilay sori-dalana ka izay no mahatara ny dian’i Joaquim Chissano”, hoy izy. Nambarany fa rehefa ho avy i Chissano dia tsy maintsy hiaro an’i Simao satria mpiasany ity farany ary mpiray tanindrazana izy roalahy.

Mazava, hoy izy, ny taratasin’i Chissano na dia tsy mahafa-po aza ary milaza hoe “inclusif” sy “consensuel” kanefa dia tsy izay no anatin’ilay sori-dalana. Hentitra ny teniny nilaza fa «tsy iny no sori-dalana farany». Notsiahivin’ny filoha Ravalomanana tamin’ity fihaonana tao Ambatonakanga ity fa mpiasan’ny SADC i Chissano ary tsy maintsy manaraka ny torolalan’ny SADC. Avo lenta ny resaka ankehitriny, hoy ny filoha Ravalomanana. Nambarany fa hisy hetsika ara-diplaomatika hataony. “Tsy maintsy mahita lalana aho. Aza matahotra fa minoa fotsiny ihany”, hoy izy.

Tia Tanindrazana

Samia mijoro ho an'i Gasikara.