Politique

Partagé sur :
• facebook

Manao ranolava ny fanehoan-kevitra niposaka taorian’ny namoahan’ny Dr Simao sori-dalana heveriny hivoahana amin’ny krizy.

Naneho ny heviny mikasika azy iny ny Me Rasamimaka Mahefalahy (Mahefa), araka ny resaka nifanaovan’ny Tia tanindrazana taminy, sy mikasika ny raharaha ara-politika sy sosialy eto amintsika.

Tia Tanindrazana (TT) : Voatonona ho mpanakorontana tao anatin’ilay raharaha posy ny 17 janoary ianao, inona no azonao ambara ?

Mahefa : Tsy hitako mihitsy izay hidirako tamin’izany raharaha izany. Tany am-piangonana namonjy fivoriana ny tenako, tamin’ny fotoana nisian’ny sakoroka. Amiko dia fanasoketana fotsiny izany, ary tsy vao androany io fa efa ela. Voaray koa ny hafatra nataon’iny olom-boatendry iny ka hodinihina tsara manomboka izao.

TT : 2.000 ariary kilaon’ny fotsimbary ankehitriny. Mikaikaika ny vahoaka. Ny hevitrao ?

Mahefa : Aiza ilay vary 500 ariary nolazaina teny an-kianja fa hitan’ny FAT, izay nanasoketana fa mivarotra vary lafo be ny filoha Ravalomanana raha namarotra ny vary 700Ar tamin’ny tena sahirana sy 900Ar teny an-tsena roa taona lasa izay ? Manahy ny mbola hiakaran’io ho ambony aza aho, efa mananiky ny 2.200 ariary mantsy io vary io raha miala 15km an’i Toamasina tampon-tanàna fotsiny.

TT : Misy ilay sori-dalana nataon’ny Dr Simao, manan-kambara momba azy iny ve ianao ?

Mafeha : Gaga aho ary nanontany tena koa hoe : tena ny Dr Simao marina ve no nanao azy iny sa efa voavolavola tany ho any, dia nasaina nekeny fotsiny ary natolotra ny mpanao politika Malagasy, hanaovana tian-kano tsy tian-kano ? Raha ny votoatiny dia tsy sori-dalana mpanelanelana mihitsy, fa sorin-dalana mpanao politika manome vahana fahefan’olon-tokana. Tsy iny sori-dalana iny no hampisy fitoniana eto, fa vao mainka hampisavoritaka ny tontolo politika sy sosialy.

TT : Tsy misy mety aminareo izany iny sori-dalana iny ?

Mahefa : Hamafisiko ihany fa tsy mety io sori-dalana io. Raha ny andininy faha-14 monja no jerena, «fa angaha tena olon-dratsy mihitsy Ravalomanana no asaina manao fanekena fa tsy hanakorontana mba hiarovana ny fananany sy ny fianakaviany ?». Dia ahoana koa io fahefana avangongo amin’ny filoha tsy voafidim-bahoaka io ? Mila misaina ny Malagasy amin’ny manaraka vao manao zavatra, fa raha manaiky horebirebena amin’ny lainga tsara lahatra lava, dia mbola loza no hitatao amin’ny hoavin’ny taranaka.

Tia Tanindrazana

Samia mijoro ho an'i Gasikara.