Politique

Partagé sur :
• facebook

Hentitra ny filoha teo aloha Marc Ravalomanana raha nitafa mivantana tamin’ny vahoaka tao Ambatondrazaka ny alahady tolakanadro teo.

Raha misy hetsika, raha misy porofo hitanareo aza misalasala fa ny marina tsy mba maty, hoy izy koa aza misalasala mampiseho ny tena fitiavana ny tanindrazana. Tao anatin’ny hafaliana tanteraka no nandraisan’ny mponina Ambatondrazaka sy ny manodidina io teniny io. Nambarany fa mandalo fisedrana ny firenena amin’izao fotoana izao koa notolorany fisaorana manokana ireo Ray aman-dreny am-panahy izay mitrotro am-bavaka ity firenena ity. Manana faharetana isika, hoy izy, fa Andriamanitra mahalala izay hitondrana ny firenentsika.

Nampihetsi-po ireo olona tonga nanatrika ny fifampirarian-tsoa nataon’ireo Vondron’olon-tsotra tao amin’ny Akany Fitiavana Avaradrova Ambatondrazaka io fidirana mivantana an-telefaonina nataon’Atoa Marc Ravalomanana io, indrindra ny nilazany fa ho laharampahamehany ny fitsidihana an’Ambatondrazaka rehefa tafaverina soa aman-tsara eto Madagasikara izy ary ny olon-tsotra no ilainy fa tsy izay mpanao politika milaza ho malaza rehetra izao. Nisy ny solontenan’ny tangalamena naneho fisaorana an’Atoa Marc Ravalomanana ka nanambara ny fahavononan’ny olon-tsotra any Alaotra hanilika ny mpanongam-panjakana. Nifandimby niditra an-telefaonina tamin’io fotoana io ihany koa ny mpitarika GTT International Gilbert Rasolofoniaina Darsot sy ny GTT any Marseille ary ny filohan’ny TIM Eoropa, Patricia Lehmann. Fiaraha-mikorana no namaranana ny fotoana tamin’io alahady io.

Tia Tanindrazana

Samia mijoro ho an'i Gasikara.