Politique

Leader Fanilo Nifoha tamin�ny torimasony

Politique
Zoma 27 Mey 2011

Raha nangingina teo aloha teo ary tsy dia hita firy maneho hevitra momba ny raharaham-pirenena ny antoko Leader Fanilo dia nifoha tamin�ny torimasony ka hanomboka ny fihaonambem-paritra. Hisantarana izany amin�ity anio ity ny any amin�ny faritra Vatovavy Fitovinany.

Araka ny fanazavan-dRakotonirina Jean Claude dia natao izao hetsika izao mba hahafahana mijery ny zava-misy sy ny fiainan’ny antoko ao anatin’ireo distrika 6 any amin’ity faritra ity. Ilaina, araka ny nambaran’ity mpikambana ao amin’ny birao politikan’ny Leader Fanilo ity, ny mijery sy mamantatra na mbola mihodina tsara araka ny tokony ho izy ny fomba fiasan’ireo birao mpanatanteraka isam-paritra. Raha napetraka sy natsangana mantsy izy ireny dia ilaina koa ny fanaraha-maso azy, araka ny fanazavany ihany ka izay no tsy maintsy hanaovana izao fihaonambem-paritra izao.

Ankoatra izay dia fotoana iray ihany koa ny hetsika tahaka izao, araka ny fanazavany ihany mba hampitan’ireo iraka manokana avy amin’ny birao nasionaly ny hafatra amin’ireo mpitarika sy mpikambana any amin’ny faritra. Hitohy any amin’ny faritra hafa ity hetsika ity, araka ny fanampim-baovao voaray ihany ary dia hisy any amin’ny farany ny fihaonambem-pirenena hotanterahana eto Antananarivo, saingy tsy mbola fantatra mazava ny datin’ny fandaharam-potoana. Voasokajy ao anatin’ireo antoko goavana sy manana ny maha izy azy eo amin’ny fiainana politika eto Madagasikara ny Leader Fanilo izay naorin’i Herizo Razafimahaleo moa, ary tena manana manampahaizana maro amin’ireo seha-pihariana isan-karazany, mahita ny mpanara-baovao politika fa efa miomana amin’izay fifidianana mety ho avy ity antoko ity ka manetsika ireo fototra any amin’ny faritra rehetra any, satria mikendry ny hahatafiditra olona maromaro eny amin’ny Antenimieram-pirenena sy ny fitantanana ny Kaominina. Tsy mbola fantatra kosa anefa raha manana kandida amin’ny fifidianana filoham-pirenena ny Leader Fanilo na hanohana kandida hafa.

RTT