Politique

Partagé sur :
• facebook

Ho an’ny antoko Manda ho an’ny Firaisankinam-pirenena, tarihin’i Lalatiana Ravololomanana dia tsy mbola azo eritreretina mihitsy aloha ny hahazoan’ny fitondrana tetezamita amin’izao fotoana ny fankatoavan’ny sehatra iraisam-pirenena, izany hoe mbola mikatso aloha ny zava-drehetra.

Tsy mbola tara anefa isika Malagasy amin’ny fikaroham-bahaolana, araka ny nambarany. Tsara raha manatanteraka dinika goavana iray indray isika eto Madagasikara, araka ny hevitry ny antoko Manda ho an’ny Firaisankinam-pirenena ihany, ary rariny sy hitsiny raha ny CNOSC, izay efa eken’ny sehatra iraisam-pirenena ny fijoroany sy ireo raiamandreny am-panahy, no mitarika sy manelanelana mandritra izany fihaonana izany. Fifampidinihana ambony latabatra ihany no tena ahitam-bahaolana matotra araka ny nambaran’i Lalatiana Ravololomanana. Tokony hisy aorian’io fifampidinihana io ny fifanarahana politika vaovao hosoniavina sy ampiharina eto Madagasikara ka hametrahana ny fiaraha-mitantana tena izy, ahitana ireo ankolafy politika rehetra ary maharesy lahatra ny rehetra ihany koa. Ilaintsika ny fahazoan’ny fitondrana tetezamita fankatoavana iraisam-pirenena, saingy tsy atao tanjona izany fa dingana ihany ao anatin’ny famahana ny krizy sy fanovana ny rafitra misy hiampitana any amin’ny Repoblika faha-IV araka ny nambaran-dRtoa Lalatiana Ravololomanana ihany.

Sary : Lalatiana Ravololomanana, filohan’ny Manda ho an’ny Firaisankinam-pirenena

Tia Tanindrazana

Samia mijoro ho an'i Gasikara.