Politique

Guy Rivo Randrianarisoa Tsy kilalao ny fiainam-pirenena

Politique
Alatsinainy 21 Febroary 2011

Maneho ny heviny tamin’ny tsy nahatanterahan’ny fiverenan’ny filoha Ravalomanana teto Madagasikara i Guy Rivo Randrianarisoa, mpitondra tenin’ny ankolafy Ravalomanana. Tamin’ny resaka nifanaovana taminy no nilazany fa “rehefa nilaza izahay fa hody dia hody tokoa. Norahonana hoe midira raha lehilahy kanefa dia nosakanana hatramin’ny farany. Izahay anefa tonga hiresaka am-panajana hamahana ny olana. Naleon’ny mpitondra HAT nanokatra ny varavaran’i Madagasikara miaraka amin’ny karipetra mena amin’ingahy ministra frantsay momba ny fiaraha-miasa Henri de Raincourt”. Tamin’izay koa no nisaorany ny rehetra nanohana ny filoha Ravalomanana sy ny ankohonany ary ireo mpiara-miasa aminy rehetra tamin’iny raharaha iny. “Fantatray sy tsapanay fa eo anilanay ianareo”, hoy izy. “Ho an’ireo izay tsy mbola mahazo ny tianay hiaviana dia tsotra : Raha mbola fanjakana mpandroba sy tsy lanim-bahoaka no eto Madagasikara dia lavinay. Ary ny Malagasy rehetra dia afaka milatsaka hitondra ny firenena”, hoy hatrany i Guy Rivo Randrianarisoa

Nangonin’i Jean D.