Politique

Gadra politika 94 no mbola tavela any am-ponja

Politique
Alakamisy 12 Mey 2011

Olona manana ny maha izy azy ny ankamaroan’izy ireo, nijoro hanavotra ny firenena teo anoloan’ny mpandroba, mpampihorohoro, mpandoro tanàna sy ireo mpanosihosy ny demokrasia sy tsy mpanaja zon’olombelona nefa dia fanenjehana nisy natao hazalambo ary fonja no niafarany. Miisa 94 izy ireo, ao ny efa voatsara saingy maro no tsy mbola nandalo fitsarana, ka tranainy indrindra amin’ireny Ralitera Andrianandraina, Talen’ny fiarovana tao amin’ny Fitsarana avo momba ny lalàmpanorenana sy ireo mpiara-miasa akaiky taminy, izay 25 volana am-ponja tsy mitsara. Any Tsiafahy ny 62 amin’ireo gadra politika ireo, ao Antanimora ny 28, voatana ao Ambatolampy kosa ny 2 ary 1 avy any Antsirabe sy Manjakandriana. Manampy azy ireo i Marc Ravalomanana izay nohelohin’ny FAT tamin’ny fividianana fiaramanidina “Force One II” sy ny raharaha “7 febroary”. Natokana ho fanohanana sy fankaherezana azy ireo ny hetsika tao amin’ny Magro omaly. “Maherifon’ny firenena” no iantsoan’ny mpandala ny ara-dalàna azy ireo. Ireto farany izay mitaky ny hamoahana azy ireo tsy misy fepetra sy tsy arahin-tsazy ireo gadra politika ireo.

Jean D.