Politique

Fandriampahalemana Hiatrana ambavam-basy ny Emmo-Reg

Politique
Zoma 18 Febroary 2011

Araka ny loharanom-baovao avy amin’ny Emmo-Reg dia hiatrana ambavam-basy izy ireo eny Ivato ny sabotsy izao. Raha ity loharanom-baovao ity dia milaza fa tsy hanaiky hatramin’ny farany ny hidiran’ny filoha Marc Ravalomanana ny Emmo-Reg. Ny jeneraly Ravalomanana Richard mihitsy no fantatra fa hitarika ny Emmo-Reg eny an-toerana. Ankoatra izay anefa dia misy ihany ny tsy fitovian-kevitra eo amin’ireo mpitandro ny filaminana, indrindra ny avy amin’ny Tafika. Ireo manamboninahitra lefitra sasantsasany no fantatra fa tsy manaiky ny hitondrana ny Tafika eny Ivato amin’io sabotsy io.

Araka ny fantatra mantsy dia anisan’ny tsy nahafaly ireto miaramila ireto ny zava-nisy tamin’ny 7 febroary ka nahafatesana sivily maro. Tsy manaiky ny hamonoana ny Malagasy izy ireo. Ny mpanao politika mandalo fa ny miaramila mitoetra mandrakariva miaraka amin’ny vahoaka ka tsy tokony hampiasain’ny mpanao politika hatao fitaovana ny miaramila, hoy ny sasany tamin’ireo manamboninahitra lefitra ireto.

Rakoto Maxime