Politique

Fanambaran'ny Tafika Tsy niseho sehatra ireo ministra

Politique
Alakamisy 17 Febroary 2011

Niala tsy nety nanao fanambarana ireo ministra misahana ny filaminana eo anivon'ny FAT omaly tao amin'ny Toby Ratsimandrava. Araka ny hita teny an-toerana dia efa tao amin'ity Toby ity avokoa ireo ministra ireo toy ny avy amin'ny Foloalindahy, ny Filaminana anatiny ary ny sekreteram-panjakana miadidy ny zandary. Nisy, angamba, ny tsy fitovian-kevitra ka nanapa-kevitra izy ireo fa tsy hanao fanambarana fa omena ireo lefitra manao izany. Na ny eo anivon'ny zandary aza dia ny lefitra faharoa no nanao ilay fanambarana.

Tsy mahagaga rahateo izany satria raha vao misy ny tranga mahamay eto amin'ny firenena tahaka ireny teny amin'ny FIGN ireny dia tsy hita ny jeneraly Razafindrakoto Bruno. Hatry ny omaly ireto ministra ireto no efa tsy nety naneho hevitra an-gazety fa nisafidy ny hangina. Asa na noho ny tahotra na tsia fa toa nahavariana ihany ny zava-nitranga omaly teny amin'ny Toby Ratsimandrava. Nionona tamin'ny filazana fa izay zavatra mety hitarika korontana dia sakanana ireo mpitandro ny filaminana teny Andrefan'Ambohijanahary omaly. Tsy nisy fitenenana kosa anefa ny amin'ny hoe hanakanana ny fahatongavan'ny filoha Ravalomanana.

Rakoto Maxime