Politique

Partagé sur :
• facebook

Noraisin’ny filohan’ny Repoblikan’i Angola, José Eduardo dos Santos i Andry Rajoelina, filohan’ny Fahefana avon’ny tetezamita, omaly alarobia 18 mey.

 Tsy nisy nanao fanambarana tamin’ny mpanao gazety mikasika ny votoatin’ny fihaonana na ny andaniny na ny ankilany, taorian’ny fihaonana naharitra 40 minitra, fa nirava mangina, araka ny tati-baovao ao amin’ny tranokalan’ny Fiadidiana ny filoha Angoley ary taterin’ny Angop na Agence Angola Press omaly. Ny talata teo no tonga tany Luanda i Andry Rajoelina filohan’ny FAT, nilaza fa hikatsaka ny fanohanan’ny fianakaviambe iarisam-pirenena hivoahana amin’ny krizy mahazo ny firenena, vokatry ny fanonganam-panjakana tamin’ny 2009 niakarany teo amin’ny fitondrana, hoy ny fitateran’ireo loharanom-baovao avy any Angola ireo. Nampahatsiahy ireo loharanom-baovao ireo fa mihantona eo anivon’ny SADC i Madagasikara mandra-pahavita ny fifidianana hiverenana amin’ny ara-dalàna araka ny lalàmpanorenana.

Io lalàmpanorenana io no milaza, araka ireo loharanom-baovao angoley ireo, fa olompirenena feno 40 taona no afaka milatsaka fidiana, nefa ny Ben’ny tanànan’Antananarivo teo aloha vao 37 taona. Miharihary amin’io fa na ny mpanao gazety, izay mitrandraka vaovao aza tsy mahalala ny fisian’izay fitsapan-kevi-bahoaka natao teto tamin’ny 17 novambra 2010, izay mamaritra fa 35 taona, mizaka ny zom-pirenena malagasy dia afaka milatsaka hofidiana filoham-pirenena.

Tia Tanindrazana

Samia mijoro ho an'i Gasikara.