Actualités

“Tsy nieren-doza ny Paska” raha ny zava-misy tao amin’ny hopitaly be sy ny tatitra azon’ny zandary sy ny polisy no jerena. 25 ireo narary sy naratra niditra ny vonjy aina tao amin’ny hopitaly be Toamasina hatramin’ny 5 ora sy sasany hariva, ny 3 vokatry ny lozan-dranomasina nandritra ny filomanosana natao, ny manodidina ny lycée Jacques Rabemananjara iny no tena nahitana ireto loza ireto, tovolahy iray tokony ho 15 taona no maty vokatra izany, ilay tovolahy sy tovovavy hafa kosa avotra ihany raha nahazo ny fitsaboana sahaza azy ireo tao amin’ny hopitaly be. Ny 10 tamin’ny loza kosa dia vokatry ny lozam-pifamoivoizana, ka Scooter sy moto no nahatonga azy. Niisa 4 kosa ireo dokotera efa miasa sy mpitsabo mpiana-draharaha niasa nanao ny vonjy aina tao amin’ny hopitaly be ankoatra ny mpibata ny marary iray. Tsy hita sy tsy tazana kosa ireo mpitsabo mpanampy sy mpampivelona ary ny teknisiana manokana misahana ny fitiliana sy ny fitarafana tanteraka ny teny nataon’izy ireo ny alakamisy lasa teo. Ho an’ny mpitandro ny filaminana mitambatra kosa, dia tsy tazana loatra izy ireo afa-tsy ireo “be moto” sy ireo nisahana ny lalam-pirenena ary ireo nitaingina vedety nanara-maso ny sisin-dranomasina, izay indroa niverina ihany tao anatin’ny tontolo andro. Raha nanontaniana ny Ben’ny tanàna, Dr Rakotomanana Gervais amin’ny maha-tompon-tanàna azy, dia hetsika vaovao no nentina ka tsy nampanaovina fanamiana ireo mpitandro ny filaminana ireo mba hanamora ny fanaraha-maso ireo jiolahy sy ny raindahiny amin’ny fanendahana sy ny sinto-mahery amin’ny toerana vory olona. Ho azy ireto kosa dia iray no maty, ka teny amin’ny tetezan’ny “Verrerie” Morarano no nitrangany. Ankoatra izay dia nahatratra 18 ny zaza sy ankizy very hita niarahany nisalahy tamin’ny Croix Rouge Malagasy. Nanomana lanonana goavana teny amoron-dranomasina moa ny Kaominina, niangalian’ny mpanakanto avy tarika valo avy ao Toamasina. Nahazo ny anjarany koa ny ankizy sy ny zaza tamin’ireo kilalao natokana ho azy izay fiaraha-miasan’ny tsy miankina mandraharaha sy ny kaominina ambonivohitr’i Toamasina.

 

 

RTT