Actualités

Partagé sur :
• facebook

Nitory ireo sivily, olom-piangonana ary miaramila, indrindra ireo mpioko avy ao amin’ny Capsat, nitsikombakomba sy niray petsapetsa tamin’ny fanonganam-panjakana teto Madagasikara ny GTT International.

Dosie mafonja mirakitra fijoroana vavolombelona noho ny herisetra, vono olona, fanolanana, fampijaliana amin’ny endriny samihafa, ireo fisamborana sy fampidirana am-ponja tsy amin’antony Malagasy maro, ny fianakavian’ireo tsy hita popoka miseho amin’ny fanosihosena ny zon’olombelona, no napetraky ny GTT International eo anivon’ny lehiben’ny fampanoavan’ny Tribonaly iraisam-pirenena, araka ny filazana an-gazety nataon’izy ireo ny alakamisy 15 aprily 2010. Nandritra ny 12 volana ngarangidina no nanaovana fikarohana, fanangonana ireo porofo mikasika ny zava-nitranga sy nataon’ny mpanongam-panjakana teto hatramin’ny volana febroary 2009. Ekipana mpitsara ao amin’ny GTT International sy fikambanana samy hafa ary fanomezan-tanan’ireo niharam-boina no nifarimbona tamin’ny fandrafetana ny dosie, izay milanja dimy kilao eo. Mpahay lalàna sy manampahaizana iraisam-pirenena samihafa no miray feo fa feno sady mafonja ahafahana manokatra fanadihadiana iraisam-pirenena ity fitoriana napetraky ny GTT International ity, ary ampy hahafahan’ny Tribonaly iraisam-pirenena mitondra ireo tompon’antoka tamin’ireo heloka bevava samihafa vitan’ireo mpanongam-panjakana eo anatrehan’ny fitsarana. Tsy azo ekena, hoy ny GTT International ny mbola hiriariavan’ny tsy maty manota manoloana ny fahoriana mianjady amin’ny Malagasy izao, ka ny hampitsaharana izany indrindra no nanosika azy ireo hiroso tamin’ity asa goavana ity, ary koa hampanjakana ny lalàna sy tsy hanosihosena ny zo fototra maha olona.

Tia Tanindrazana

Samia mijoro ho an'i Gasikara.