Actualités

Fanodinkodinam-bolam-panjakana Any an-tranomaizina ny �percepteur principal�

Actualités
Zoma 16 Aprily 2010

Manao tohivakana ny fitsarana mpiasam-panjakana voarohirohy amin’ny fanodinkodinam-bolam-panjakana. Voapanga ho nanao izany teti-dratsy izany ny “percepteur principal” teo anivon’ny faritan’Antananarivo etsy Tsaralalana. Ny 19 septambra 2006 no niseho ny fahaverezam-bola mitentina valo hetsy sy enina tapitrisa ariary tamin’ity biraom-panjakana ity. Nosaronana resaka vaky trano ny raharaha tamin’izany saingy rehefa noraisin’ny fitsarana heloka bevava an-tanana ny famotorana dia fantatra fa tsy mitombina fa ingahy “percepteur principal” no nitondra ny lakile ny zoma hariva ka namoaka an-tsokosoko ny vola. 12 ireo voarohirohy ka anisan’izany ny vady andefimandriny. Na dia niaro tena mafy aza izy mivady teny anoloan’ny fitsarana dia tsy nisy afa-bela. Sazy dimy taona an-tranomaizina no azony raha telo taona kosa ny an’ny vadiny. Afaka madiodio ny telo ary nohafahana noho ny fisalasalana kosa ny fito ambiny.

Andry